विकल्प एन अल्टरनेटिभले निर्माण गरेको छोटो चलचित्र ‘ सकस ‘ को प्रिमियर शो भव्य रुपमा सम्पन्न भएको छ। सनिबार विराटनगरको सिटि सिनेमामा २०० बढी दर्शकको उपस्थितिमा भएको प्रिमियर शोमा चलचित्रका कलाकारहरुदेखि लिएर विराटनगर महानगरपालिकाका मेयर नागेश कोइराला लगायत विभिन्न क्षेत्रमा आबद्ध रहेका व्यक्तिहरुको बाक्लो उपस्थिति रहेको थियो । सो अवसरमा चलचित्रका कलाकार लगायत चलचित्र निर्माणमा सहयोग गर्ने विभिन्न व्यक्ति तथा संस्थाहरुलाई समेत प्रमाण पत्र र मायाको चिनो प्रदान गरी सम्मान गरिएको थियो ।
डुगन ब्रिज्सको निर्देशनमा एट्लास नेटवर्कको सहयोगमा निर्मित चलचित्र ‘ सकस’ ले एउटा नागरिकले सवारी अनुमतिपत्र (लाइसेन्स) नहुँदा र विभिन्न कारणले बनाउन पाउंदा कतिसम्मको सास्ती भोग्नपर्छ भनेर चित्रण गर्न खोजिएको छ । लाइसेन्सको अभावमा एक व्यक्तिले सवारी चलाउन नपाउँदा उसको परिवारको जिविकोपार्जनमा कस्तो प्रभाव पार्दछ भनेर यस चलचित्रले देखाउन खोजेको छ ।
चलचित्रमा प्रवेश तिम्सिना, रश्मि उप्रेती , जीवन बस्नेत , सुदिप जंग कार्की , भारत कार्की , अस्मिना भट्ट कर्ण , निरज ब्ल्याक र उद्धव सापकोटा लगायतको अभिनय रहेको छ । प्रिमियर शो हेरेपछि उपस्थित् दर्शकहरुले चलचित्रको तारिफ गरेका थिए ।