विराटनगर। जिल्ला प्रशासन कार्यालय, मोरङले यस वर्षको होली पर्व र इस्लाम धर्मावलम्बीहरुको महान महिना रमजानुल मुवारक (रमजान) पर्व घर भित्रै बसेर मनाउन अनुरोध गरेको छ। जिल्ला प्रशासन कार्यालय मोरङले दुई विज्ञप्ति जारी गर्दै यस वर्षको पर्व घरमै मनाउन अनुरोध गरको हो।
प्रशासन कार्यालयले फागुन १४ गते विज्ञप्ति जारी गर्दै फागुन १९ गते तराईको होलीको दिन निर्वाचनको मौन अवधि सुरु भैसकेको हुनाले सार्वजनिक स्थलमा होली नमनाउन, डिजे तथा साउन्ड सिस्टम नबजाउन, कुनै पनि किसिमको सामाजिक भोजभतेर र संस्कृतिक कार्यक्रम नगर्न र नगराउन र निर्वाचन आचारसंहिता विपरितको गतिविधि नगर्न अनुरोध गरेको छ।
त्यस्तै, प्रशासन कार्यालयले फागुन १४ गते अर्को विज्ञप्ति जारी गर्दै रमजान महिनाको (१३,१४,१५ हिजरी) पर्ने फागुन १९,२० र २१ गते मौन अवधि र मतदान हुने भएकोले निर्वाचन संवेदनशीलतालाई मध्यनजर गरी घरपरिसर भित्रै मनाउन र घर बाहिर वा मस्जिदमा कुनै पनि किसिमको सामूहिक भोज-भतेर, संस्कृतिक कार्यक्रम र निर्वाचन आचारसंहिता विपरितको गतिविधि नगर्न समेत अनुरोध गरेको छ।
प्रशासन कार्यालयले निर्वाचन आचारसंहिता विपरितको गतिविधि भएमा कारवाही गर्ने चेतावनी समेत दिएको छ।